U quartieru di a gara di Bastia hà da cambià aspettu : gara, alloghji, scagni, lucali cummerciali, parcheghju… Un cumitatu di pilotaghju per preparà i travagli hè statu creatu da a Cullettività di Corsica, i Chemins de Fer de la Corse è a cità di Bastia.

In core à a cità, u quartieru attuale di a gara di Bastia pare piuttostu una zona industriale abbandunata. Ma da quì à u 2025, duveria avè tutt’un altru aspettu.
A prima tappa di i travagli principierà l’annu prossimu : i capannoni, per u più disaffettati è di i quali solu unu serve sempre à a manutenzione ligera, seranu distrutti.
Da u mese di ghjennaghju principierà a custruzzione d’un novu capannone in Casamozza, nant’à u situ chì assicura dapoi u 2012 a manutenzione pisante di i treni isulani.
Cù stu novu capannone, tutta a manutenzione si farà in Casamozza. U costu di a custruzzione hè stimatu à 4 milioni è 200 mila eurò.
Un prugettu glubale stimatu à circa centu milioni d’eurò
In Bastia, dopu à a distruzzione di i capannoni, trè isulotti duverianu esse custruiti : unu per a gara è dui per alloghji, scagni è cummerci à pianu di terra, cù un parcheghju di 900 piazze. « Ci seranu alloghji suciali in numeru abbastanza impurtante, per cuntinuà i sforzi di mischju suciale in u centru anzianu è in pienu centru di Bastia. » spiega Jérôme Terrier, direttore generale di i servizii di a cità di Bastia.
À termine, u prugettu prevede navette ogni 15 minuti trà a gara di Casamozza è quella di Bastia, chì serà cumpletamente riaccunciata.
U novu quartieru di a gara puderia dopu esse ligatu à quellu di Toga da un tram-trenu.
U ripurtaghju di Maïa Graziani è François-Albert Bernardi
Fonte : France 3 Corse Viastella